Ingimundur Ingimundarson var eins og strákarnir hundfúll með tapið. Eðlilega, en við blaðamenn erum virkilega ánægðir með strákana. Það er ekki öllum gefið að bjóða sig fram í viðtöl eftir svona leiki en þeir gerðu það allir án þess að hika. Diddi sagði að sjálfstraustið hafi farið í liðinu í seinni hálfleik en hann ætlar sér á verðlaunapall.

„Ég veit varla hvað ég á að segja. Það hrundi einhvernvegin allt hjá okkur. Allt hrundi. Einna helst var Aron flottur en í seinni hálfleik hrynur bara allt. Vörn og sókn, við gerum allt of mikið af mistökum og fáum hrúgu af hraðaupphlaupum á okkur í staðinn. Við missum sjálfstraust á báðum endum vallarins og þá gerist þetta svona, þegar maður er að spila á móti svona frábæru liði.“

Frakkarnir hreinlega refsuðu okkur fyrir öll mistök og kláruðu þetta bara í byrjun seinni hálfleiks.
„Já það er rétt. Þeir eru ótrúlega segir í að refsa mönnum fyrir svona hluti, þeir nýttu sér það vel í dag.“

Hvernig verður að gíra sig upp fyrir leikinn á morgun?
„Nú horfum við bara fram á veginn. Við erum ennþá í möguleika á að ná í medalíu og það er stórt mál. Eftir sturtu hugsar maður bara um næsta leik. Það er enn brons í boði. Brons er alltaf brons. Við erum ekkert hættir þó svo að við náum ekki gullinu núna, við tökum það sem í boði er,“ sagði Diddi.