„Maður spilar aldrei betri en andstæðingurinn leyfir og við náðum ekki upp okkar besta leik í dag. Ég held að við getum allir verið sammála um það. Þeir unnu þetta kannski verðskuldað bara,“ sagði Sturla Ásgeirsson eftir leikinn. Sturla lék í nokkrar mínútur í dag en hann segir að strákarnir séu staðráðnir í að tryggja sér bronsið á morgun.

„Í fyrri hálfleik vorum við vel inni í leiknum og hefðum kannski getað verið í betri stöðu í hálfleiknum. En svona spilaðist þetta bara. Það gerðist eitthvað í seinni hálfleik og þeir sigldu bara eiginlega yfir okkur.“

„Við gerum svolítið af mistökum, veljum röng færi til að skjóta úr og reyndum að troða boltanum inn á línuna þegar við áttum ekki að vera að því. Við gerðum marga tæknifeila og það gerði þeim auðvelt fyrir að skora úr hraðaupphlaupum. Við lentum í basli með það.“

En þetta er ekkert búið ennþá og það er ennþá brons í boði. Við ætlum að sjálfsögðu að taka það, ekkert annað kemur til greina.“